PRESBYTERIAN KOHHRAN NEWS:
Synod Pastors’ Retreat 2009
Mizoram Presbyterian Church Synod hnuaia Pastor-te chuan May 26 atang khan Aizawl Theological College (ATC)-ah intuaitharna an nei tan. Pastor-te intuaitharna, Pastors’ Retreat hi kum khat dana neih thin a ni a, Pastor thawklai leh pension tawhte, ram chhung leh pawna mite tel vek tura beisei an ni thin. Tun tumah hian Thupui atan “Ka thlarau zawkin le” (Zakaria 4:6) hman a ni.
May 26 zan khan Retreat Hawnna Inkhawm neih a ni a, Synod Moderator Rev. H. Lalchhanhiman hawngin thuchah a sawi. Thu dawnna hnuhnung berah chuan Pastor 387 an inziak lut tawh a, pensioner 47 lai an tel thei. A tam zawk hi riak lut an ni a, pensioner leh khawpui chhung Pastor thenkhat chu langin an kal bawk a ni.
Retreat chhung hian zing dar 7:00 ah Inkhawm neih ziah a ni ang a, chawhma leh chawhnuah thupui hrang hrang zirho thin a ni dawn a, zan dar 6:00-ah Pathian Biak Inkhawm a awm bawk ang.
Retreat chhung hian thupui hrang hrang - Pastoral Ministry Thlirletna (Rev. C. Rosiama), Kohhrana Harhna Dik (Rev. Lalthankhuma), Ka Thlarau Zawkin Le (Rev. Vanlalbela), Pastor-te Kohhran Mipuiin An Beiseina
(Upa C. Thansiama), Synod Ziak Loh Dante (Rev. R. Lalnuntluanga) te zirho a ni ang. Zirtawpni chawhnuah Rev. Zosangliana Colney, Executive Secretary kaihhruaiin Zawhna & Chhanna hun buatsaih a ni ang.
Pathian Biak Inkhawma thusawitu turte chu Rev. B. Lalnghakliana, Rev. Lalzuithanga, Rev. C. Laltanliana,
Rev. C. Lalsangliana leh Rev. Lalbiakhluna te an ni a. Zirtawp zanah Rev. Dr. R. Lalbiakmawia kaihhruaiin Retreat Kharna Inkhawm neih a ni ang a, Senior Executive Secretary Rev. Dr. Lalhmangaihan thuchah a sawi ang.
Pentikos Ni
May 31 (Pathianni) hi Pentikos Ni a ni a. Pentikos tih awmzia hi ‘Ni sawmngana’ tihna a ni. Thuthlung Hlui-ah chuan Kalhlen Kut tiak ni atanga ni sawmnganaah an hmang thin.Thuthlung Thar hunah erawh chuan Isua Thawhleh tuk (Easter) atanga ni 50-naah hman a ni ta a ni. Presbyterian Kohhran chuan Pentikos ni hi Assembly Tawngtai Inkhawm atan an hmang thin. India Hmarchhaka Presbyterian Inkhawmpui (Assembly) vawi 20-na, April 28 -30, 1972-a Churachanpur-a neih tumin hetiang hian rel a ni:-
Pentikos Ni hi Chanchin Tha hrilna (Evangelism) atana Tawngtai Ni-ah kum tin hman a ni ang a. Hemi nia thilpek lakkhawm Kohhran zawng zawngin he mi atan hian an dah hrang ang a, thilpek lakhawm thei lo an awm erawh chuan tawngtaina tal an hmang tho ang. ( Assembly Thurel No. 3, April 28, 1972 ).
Kumin Pentikos Ni-a Inkhawm dan tur hetiang hian ruahman a ni:
Chawhma Inkhawm
Thupui : Thlarau Thianghlim a lo thlenin zirtîrte
hmun khatah an awm khâwm
Chhiar tûr : Tirh. 2:1-4; 4:23-31
Chawhnu Inkhawm
Thupui : Thlarau Thianghlim - Ringtute tichaktu
Chhiar tûr : Tirh. 1:1-8; 4:8-14
Zan Inkhawm
Thupui : Thlarau rah
Chhiar tûr : Gal. 5:22-26
Zan Inkhawmah hian PCI Assembly puala thawhlawm lakkhawm a ni ang a, Bial Treasurer kaltlangin Synod Office-ah theh luh tur a ni. PCI General Assembly Headquarters: Shillong atangin tawngtaina thupui tur duan a ni a, a remchang apiangin heng thupuite hmang hian tawngtairual hun hman ni se -
1. General Assembly rawngbawlna avanga lawmthu sawina
2. Council For World Mission hnuaia kan Missionary-te tan
3. Mission hna thawktu- Halflong-a Dimasa-ho zinga thawktute; Zou Synod hnuaia Mangjing Field; Ri Bhoi Synod hnuaia Amjong leh Marngar Field; KJP Synod Mihngi huam chhunga Byrwai Field leh Manipur Synod hnuaia Sekmai Field-a mite tan.
4. General Assembly Office-a thawktu zawng zawngte tan
5. Administrative Secretary pathum- Rev. Laldawngliana, Rev. Lalramliana Pachuau leh Rev S.S. Majaw-te leh an chhungkua theuhte tan.
6. Presbyterian Church of India (PCI) hnuaia Synod zawng zawngte thawhhona leh inpumkhatna tha zawk a lo awm zel theih nan
Whit Monday
June 1 (Thawhtanni) hi Whit Monday a ni a, Synod Office leh Synod Department hrang hrangte an chawl ang.
MSSU
May 29 & 30 hian Samlukhai Kohhranah Sunday School Zirtirtu Training neih a ni dawn a, training neihpui tur hian Pu Lalthahluna Ralte, MSSU Asst. Coordinator leh Upa Hrilthansanga, MSSU Trainer-te an kal ang.
May 29 & 30 hian Aibawk Bial huapin Aibawk Kohhranah Sunday School Zirtirtu Training neih a ni dawn a, training neihpui tur hian Upa K. Lalremruata, MSSU Office Assistant leh Upa K. Zoremsanga, Trainer-te an kal ang.
Obituary
Pu Z. Malsawmtluanga (k. 35), Synod Home Mission School, Bungtlang South-a Acting Headmaster chu May 25 dar 6:00 khan a thawhna Bungtlang South-ah Malaria natna avangin a thi, a nupui Pi Lalzuithangi leh a fanu Lallawmzuali a kalsan. Pu Z. Malsawmtluanga hi Upa R. Ralbela leh Pi Darpuii, Vairengte te fa 10 zinga a parukna a ni a, kum 2001 April 24 atangin Synod Mission Board hnuaiah a thawk tan a, Zehtet, Zawlpui leh Saibawih Home Mission School-ah te a thawk tawh a ni. A ruang hi May 26 khan Aizawl lamah rawn phurh phei a ni a, Venghluia a chhungte inah chawlhpui zawk a nih hnuah an khua Vairengte panpui a ni a, nimin (May 27) chhun dar 12:00 khan Synod Mission Board Secretary Rev. Vanlalbelan a vui a ni. A vuinaah hian Synod Mission Board-a thawktu thahnem tak an tel a ni.
Moderator Programme
Synod Moderator Rev. H. Lalchhanhima chuan kar tawpah hetiang hian hun a hmang ang:
May 26 - 29 (Tue - Fri) - Pastors’ Retreat at ATC
May 31 (Sunday) Chawhnu - Kanan Kohhran
Zan - Tuikhuahtlang Kohhran