MMEM

TUALCHHUNG CHANCHIN THAR

May 30th, 2009 | by admin |

Chief Minister, Pu Lal Thanhawla’n sorkarin Home Guard-te hmasawnna leh hamthatna tur kawng hrang hrang a ngaihtuah mek tih a sawi. Mizoram Home Guards Batch 29-na Recruit Volunteer-te passing our parade, nimina a hmanpuinaah CM chuan he thu hi a sawi a, he parade hi Sesawnga Central Training Institute (CTI)-ah neih a ni a, CM bakah Minister, Parl. Secretary, MLA, DGP leh sorkar mi pawimawh engemawzatin an hmanpui a ni. CM hian Parade a endik hnuah a hmaah Home Guards Volunteer-te hian rinawmna thu an tiam a, march past chibai buk a chhan thu-ah thu sawiin, Home Guard-te hna leh Mizo tlawmngaihna chu a inmil hle a ni, a ti a, ven himna bakah leilunga chhiatna a thlen chang pawhin Home Guard-te chu sorkar leh mipuiin an thlamuanpui hle tih dawiin, an hmasawnna leh hamthatna tur kawng hrang hrang ngaihtuahsak mek an nih thu a sawi a ni. Tun tuma Home Guard Recruit Volunteer Batch 29-na te hian nikum Nov. ni 17 atang khan CTI Sesawng-ah training an nei tan a. An training chhung hian an duty-naa tangkai tur ngaihtuahin syllabus-te pawh siam rem ve zel a ni a. Subject hrang hrang - Physical Training, Drill, Battlecraft, Field Craft, Fire Fighting, First Aid, Disaster Management bakah ralthuam hmante pawh zirtir an ni a. Platoon 6-ah in thenin, intihsiakna hrang hrang huaihawt a ni thin bawk. Dam lohna leh harsatna dang avanga training zo thei ta lo mi 6 an awm a, training zo fel thei ta te hi mipa 147 leh hmeichhia 25, an vaiin mi 172 an ni. CM hian CTI, Sesawnga ram buai laia nunna chante hriatrengna ‘Martarte Thlan’ chei that mek chu a tlawh nghal a ni.

North Cachar Hills-a Dimasa hel pawlten an kah thin vanga hun rei tak chhung rel tlan tawh lo chu vawiin khan hlawhtling taka tlan chhunzawmtir a ni. Food, Civil Supplies and Consumer Affairs Secretary, Pu K. Riachho sawi danin he rel tlan chhintir leh hian Mizoram buhfai tur leh Tripura buhfai tur ton 5000, Wagon 15-in a phur a, Mizoram chan tur hian vawiin khan Badarpur chhuahsanin Bairabi a pan a, a buhfai phurh hi Bairabi-a FCI kudam ah a dah dawn a ni. Rel hi hlawhtling taka tlan chhintir theih a nih tak avangin Railway hotute chuan Lumding atangin vawiin hian rel dang an rawn thawn chhuak leh dawn a ni. Hemi bakah hian Guwahati atangin Truck 19, buhfai ton 410 phur  leh Ramnagar atangin truck 14, buhfai ton 339 phur vawiin khan rawn thawn chhuah leh a ni bawk a, rel lama harsatna a awm chuan Assam sorkarin Mizorama buhfai phur tur Motor ruahman a tum tih a sawi a, him taka rel a tlan theih nan rel kawng sir tawn tawn, Metre 100 hmuh theiha sam fai vek a ni a, hel pawlte umbo turin tunlai hian Operation ngawrh taka thlak a ni bawk tih Pu K. Riachho chuan a sawi.
———–

Aizawl atanga Champhai panna kawngpui chu Keifang bulah mimal quarry minin nimin tlai atang khan a hnawh ping a, vawiin chawhnua then fai beisei chu hna a chak loh avangin vawiinah a tlang hman dawn lo nia thu dawn a ni. Champhaia kan Corr. hnen atanga thu dawn danin, he quarry min hian nimin tlai khan Champhai North bial MLA, Pu TT Zothansanga motor a delh a, he motor hi vawiin khan lak chhuaha siam that tura Aizawla lak a ni a, a hnung lam a delh chhia nia thu dawn a ni. Pu TT Zothansanga pawh na vak lovin a hliam a, Saitual damdawi panpui a ni a, a ngaihtuahawm lo tih hriat a nih hnuah Pu Zothansanga hian Aizawl a rawn pan leh nghal a ni.
————-

Health Minister, Pu Lalrinliana Sailo chuan zuk leh hmuan leh eirukna chu a taka do a ngai tih a sawi. He thu hi vawiina Chaltlanga Mizoram State Tobacco Control Society (MSTCS) Office thar hawnnaa a sawi a ni a, Pu Lalrinliana chuan kumina vaihlo do kum hman atang hian a taka hmasawn a pawimawh tih sawiin, vaihlo that lohzia tlangaupui atangin a taka nghei an awm tur a ni a, campaign chu hlawh hmuhna ang chauha a hminga ti mai mai lovin, theihtawp chhuah a ngai tih a sawi a ni. Mizoram State Tobacco Control Society (MSTCS) hi Health Department hnuaia vaihlo dona kawnga thawktu pakhat atana din a ni a, vawiina an Office thar hawn hi Mizoram Kohhran Hruaitu Committee Chairman, Rev.H.Lalchhanhima’n Pathian hnenah a hlan a ni. Mizoram State Tobacco Control Society (MSTCS) hi Mizoram-a vaihlo leh a kaihhnawih laka mipui an him theihna tura zirtira bawhzui tura din a ni a, tualchhung, ram chhung leh ram pawn huap pawha vaihlo dona kawnga thawhpui tur an awma thawhpui tur an ni.
————-

Zokhawthara Myanmar nena ramria insumdawn tawnna chu vawiin khan hawn leh a ni a, Champhai SP, Pu C. Lalthanmawia hnen atanga thu dawn danin, thiltih dan engkim, a hmuna enfelpui turin Champhai SDPO leh a hote chu vawiin khan Zokhawtharah tirh an ni. Kan Corr. thu dawn danin tuna Border Trade Point hawn leh tak hi Zokhawthar leh Zokhawmawia bungraw tangkhang thahnem tak awm khawm thawn fel nan a ni a, ni hnih khat chhung vel chauh hawn a ni ang. Hetih lai hian Zokhawthar atanga Champhai thlenga bungraw phurh chungchanga Champhai Transport Union leh Zokhawthar Welfare Committee inkara inhriatthiam lohna ching fel turin tan lak zui zel a ni a, vawiin khan Champhai Transport Union chuan he thil chungchangah hian Champhaia tlawmngai pawl hrang hrangte biakrawn nan inkhawm a buatsaih a ni. Hemi hma lam hian Champhai Transport Union leh Zokhawthar Welfare Committee-te chu bungraw phurh leh singsak chungchanga inhriatthiam lohna an neih ching fel turin tum engemawzat an inbe tawh a, tun thlengin a la hlawhtling thei rih lo a ni.
———–

Chalfilh Group YMA Conference chu Ningani atanga nimin thleng khan Ratu-ah neih a ni a, hetah hian resolution pass-in nakkuma YMA General Conference-a kum puan atan ‘ruihhlo do’ tih put luh leh an tum. An resolution pass dangte zingah chuan Chalfilh Group YMA huam chhungah chak zawka ruihhlo do an tum thu pawh a tel a, National Highway No. 150 siam tha tura tuna survey neih mek chuan Khawruhlian, Khankawn leh Pehlawn pal tlang ngei se an duh thu leh tuna kawng awm lai hmanzui an duh thute, Darlawn rama Humlohzawlah 5th IR Battalion Hqrs. dah tura sorkar ngente, Chalfilh tlanga thing leh mau leh nungchate tha zawka humhalh an duh thute a tel a ni. He Group YMA Conference hi Deputy Chief Whip, Pu RL Pianmawia, Parliamentary Secy, Pu Lalrinmawia Ralte leh Central YMA Treasurer, Pu Vanlalrema Rokhum-ten an hmanpui a, Conference hi Chalfilh Group YMA President, Pu Lalthlamuana’n a kaihruai a ni.
———-

Law & Judicial Minister, Pu Lalsawta’n nimin khan ni thum awh, hlemhletna dona training, ATI-in a buatsaih kharna inkhawm, ATI Conference Hall-ah a hmanpui. He training hi Group A Officer te tana buatsaih a ni a, a kharna inkhawm kaihruaitu, ATI Director, Pu K. Riachho chuan Department hrang hranga thawkte puala hetiang training buatsaih hi zawngchhang chi tak nia a ngaih thu a sawi. Minister chuan Mizoramah hian a manhla hle tih a sawi a, inman leh inhrem a awm loh bakah zah an la kai mah zawk emaw ti tur a ni bawk a, hei vang hian a tirem tura beihpui thlak pawh thil harsa tak ni mah se, tihtak zeta inzirtirna nena tan lak chuan tihrem theih ngei a beiseiawm tih a sawi. Minister chuan Bawrhsapin Lamsuaka te thian dun a khaihlum khan misual an tim phah hle a, tunah pawh hian officer lian hlemhlete hi Central Jail-ah khung ni sela, corruption hi a ziaawm phah ngei a beisei thu a sawi bawk. He corruption do training-ah hian Sorkar Department hrang hrang atangin Group ‘A’ officer 21 an tel a.  Mithiam leh corruption lama hmingchhe lo, pawn lam atangin lecture pe turin engemaw zat an sawm a ni.   Training-te aiawha thusawitu, Industries Jt.Director, Pu G. Malsawmdawngliana pawhin duh leh duh loh ni lovin, sorkarin tihluihnain Department-tin officer-te tan hetiang training hi huaihawt se a duh thu a sawi a ni.
——————

Mizoram Cultivator and Labour Union, MICLUN chuan Agriculture Minister, Pu H. Liansailova nimin khan an chawimawi. Hemi pual inkhawm, Teachers Inn, Mc Donald Hill-a neihah thu sawiin Pu H. Liansailova chuan mihringte eizawn nan Pathianin leilung a pek hi humhalh that a tul thute, a tangkai thei ang ber leh hlawk thei ang bera hman a tul thute a sawi a, leilung hmang tangkai turin mithiamte kaihhruaina a pawimawh rualin hnathawktute an pawimawh a, taihmakna, rinawmna leh inpekna tak tak neia hna thawh a tul a ni a ti………. He inkhawmah hian MICLUN chuan Agriculture Minister, Pu H. Liansailova chu mi hmingtha, rinawm leh Pathian tih mi a ni tih tarlangin lo neitute hamthatna tura sorkar hma lakna chu an thlawp tlat tih an sawi a, Minister chawimawi nan hian Tawlhloh puan leh thuziak an pe a ni. ………
——-

National Games lo awm tur inbuatsaihna atan vawiin khan Archery Association of Mizoram chu Venghlui-a Pu V.Biaksanga Inah thal fang siamin an hnatlang a, thal fang 500 chuang an siam. Archery Association of Mizoram hruaitute hnen atanga thu dawn danin, National Games lo awm turah hian Mizoram chu thal inkahsiak-ah hian an tling a, hemi atana an lo inbuatsaihna turin Sports Minister, Pu Zodintluanga chuan thlal kahna tur hmun a ruahmansak tawh a ni. Archery Association of Mizoram hruaitute chuan kum tina khelh thin, Archery National Championship-ah qualify-in an khel ziah tih an sawi a, Medal pawh 50 chuang an la tawh tih an sawi a, hei bakah hian an member, K.Lalremsanga chu kum 1992 Barcelona Olympic leh kum 1996 Atlanta Olympic-ahte khan a tel tih an sawi a, Olympic-a an hman thin thal ngul tha chi, cheng nuai khat chuang man 5 leina turin Sports Minister Pu Zodintluanga’n pawisa a pe tih an sawi bawk.
————–

Mizoram Chess Association buatsaiha Mizoram Senior Chess Championship vawi 3-na leh Mizoram Super Twelve Chess Championship vawi 4-na chu vawiin khan Electric Veng YMA Hall-ah khelh zawh a ni. Senior Championship-ah hian C.Lalzarliana, Bethlehem Vengthlang chu pakhatna a ni a, cheng 3,000, medal leh certificate a dawng a, pahnihna chu C.Lalsangluaia, Mission Veng niin cheng 2,000, medal leh certificate a dawng a, pathumna chu F.Khawpuimawia, Republic Veng niin cheng 1,000, medal leh certificate a dawng a ni. Mizoram Chess Association hnuaia player tha 12-te telna, Super Twelve Championship-ah hian Lalnunsanga, Durtlang chu pakhatna a ni a, cheng 5,000, medal leh certificate a dawng a, Vanlalfinga, Dinthar chu pahnihna niin cheng 3,000, medal leh certificate a dawng a, pathumna chu BT Romawia, Bethlehem Vengthlang niin cheng 2,000 medal leh certificate a dawng a ni.
————–

Chanmari West Branch K|P chuan vawiin khan Aizawl Civil Hospital-a hman atan thisen Unit 45 an pe a, thisen petute hi mipa 40 leh hmeichhia 5 an ni a, an thisen hi Civil Hospital Blood Bank-a thawkte’n an Kohhran Hall-ah an laksak a ni.

Guwahati leh Ramnagar atanga Mizorama buhfai phurh luh dan chu a fel tan ta. Food, Civil Supplies and Consumer Affairs Secretary, Pu K. Riachho hnen atanga kan Corr. thu dawn danin, Zirtawpni kal ta khan Truck 55, Pathianni khan Truck 37, Thawhtanniah 42 leh niminah Truck 41 phur thawn luh a ni a, vawiina thawn luh zat erawh chu a la hriat theih rih loh a ni. Zawhna chhangin Food and Civil Supply Secretary chuan tuna a kal dan anga Mizorama buhfai thawn luh theih a nih chuan harsatna a awm lo ang a, amaherawhchu heta tang hi chuan fur chhung ei tur, thingtlang Kudama chhek khawl erawh chu a harsa deuh hmel a, fur ruahtui tlak tam hunah kawng chhia avanga harsatna tawh theih a nih avangin nasa taka tan lak a ngai tih a sawi. Zawhna dang chhangin rela buhfai leh mamawh dang phurh theih dan pawh sorkar laipuiin a ngaihtuah mek a, hun rei lote hnuah an tih tum dan a chiang thei dawn niin a sawi bawk. Kan Corr. thu dawn danin, Lumding-Badarpur-Silchar section-a rel a tlan theih loh avang hian buhfai leh thlai bakah ei chawp thil man a sang chho mek a, he harsatna hi Mizoram bakah Tripura leh Cachar District-a mite pawh an tuar a ni.

Chief Minister, Pu Lal Thanhawla chu Delhi atangin vawiin khan a lo haw a, a cham chhungin National Disaster Management Commission Chairman leh memberte a kawm a, anni hian hun remchang hmasa berah Mizoramah training rawn buatsaih an tum thu Chief Minister hi an lo hrilh niin sorkar thuchhuahin a sawi. CM hian lei min leh tui lian danna lam thilte, khaw chin zirna hmanrua lam thilte pawh a buaipui a, National Development Volunteer Training Institute nen pawh Mizorama training buatsaih theih dan turte an sawiho bawk niin sorkar thuchhuah chuan a sawi.
————

Mizoram sorkarin sa zawrhna rate mumal zawka siam nan dan fel tak siam thuai a tum. He thu tlukna hi Trade and Commerce Minister, Pu Lalrinliana Sailo hova vawiina a office-ah inkhawmah siam a ni a, hetah hian Aizawl khawpui veng hrang hranga sa man mumal lo leh inang lo te, sa leituin a duh lai leh a duh dang anga a lei thei lo chu tha an tih loh thute sawiho a ni a, sa man bithliah tur leh khuahkhirh tura dan mumal tak la awm lo chu sawi hovin dan lailawk, ‘ordinance’ chhuaha sa man bithliahna dan siam thuai ni se an ti a ni. He ordinance buatsaih chhung hian veng hrang hrang VC-te chu an veng theuhva sa man mumal tak leh inang tlanga siam dan zawng turin ngen ni se an ti bawk a ni. He inkhawmah hian Trade and Commerce Minister, Pu Lalrinliana Sailo bakah Parliamentary Secretary, Pu S. Laldingliana, Trade and Commerce Secretary, Pi Esther Lalruatkimi, Aizawl DC aiawh, LAD Director aiawh, Law and Judicial Department aiawhtu, Under Secretary, Pu Zahmingthanga Ralte leh SDO Sadar, Pu Lalhmachhuana te an tel a ni.
——–

Land Revenue & Settlement Directorate buatsaihin Mizoram District 6-a he Deptt. Officer leh thawktu dangte tan ram enkawl dan chungchang zirhona, vawiin khan Revenue Minister, Pu J.H.Rothuama hovin neih a ni a, Minister chuan mi retheiten in leh lo, anmahni puala an neih ve theih nana tanpui theih dan tur ngaih pawimawh tul a tih thute, retheite chhanchhuahna tur NLUP-ah pawh kut hnathawktute tan lo hmun nghet ruahmansak a tul tur thute a sawi. Revenue Secretary, Lalbiaktluanga Khiangte pawhin he Deptt.inrelbawlna leh kalphung hrang hranga sum lam harsatnate pawh Asian Dvelopment Bank hmanga phuhruk a nih tur thu a sawi a, ram teh fel, Cadastral Survey pawh tun aia chak leh huamkim zawka tih dan ruahmante, ram chungchanga Dan ennawn leh a thar buatsaih a nih tur thute a sawi bawk. He Workshop-ah hian Land Record mumal zawka siam a nih theih nana thawh dan turte, ram leilung chhiah khawn changtlung zawka kalpui dan turte leh tuna District level thleng chauhva inrelbawlna fel awm chu Village level thleng inzamchhuak thei tura Department inrelbawl dan siksawi chungchangte zir ho nana tih a ni. Land Revenue & Settlement Department hian Mizoram chhunga cheng chhungkaw tinte in hmun, lo leh huan ramte teh fela Land Record siama ram buai chin fel leh mimal ram humhalhpui leh chhiah khawn-ahte mawh a phur a, khawpuia puan khaw 74-ah In hmun Pass leh LSC-te pek chhuah an ni. Kum 2008-09 chhung khan he deptt. hian chhiah, cheng nuai 264 an hmu a, hmuh an beisei, cheng nuai 195 chu cheng nuai 69-in a khum a ni.
—————

Mizoram Board of School Education (MBSE) chuan kumin HSLC leh HSSLC Compartment Exam Result a tichhuak. He Exam result chhuakah hian HSLC-ah exam zawng zawng za-a 64.79 an pass a, HSSLC Arts-ah za-a 55.08-in an pass a, Science-ah za-a 69.57, Commerce-ah za-a 60-in an pass a, Computer Technique-ah za-a 37.50, Vocational Course Software-ah za-a 80, Hardware-ah pass an awm lova, Vocational Course tho, Garments-ah za-a za an pass a, Automobile-ah za-a 50 an pass a ni.
————-

Member 21 awmna, Chakma Autonomous District Council-ah eptu member 1 chauh a awm ta a, member 27 awmna, Lai Autonomous District Council-ah pawh eptu member 2 chauh an awm ta. Lawngtlaia kan Corr. hnen atanga thu dawn danin Chakma Autonomous District Council-a MNF member 7 zinga 6-te chuan tun hnai khan Chakma Democratic Party dinin Legislature Party hran an siam a, Chakma Autonomous District Council-a Congress hruaitu, Pu Kali Kumar Tongchongya kaihhruai sorkar an thlawp tih an puang a ni. Tun dinhmuna Chakma Autonomous District Council-a MNF member la awm chhun hi CEM hlui leh MLA hlui pawh ni bawk, Pu Rasik Mohan Chakma a ni a, member 27 awmna, Lai Autonomous District Council-ah pawh MNF member 2 chauh Congress sorkar thlawp lotu an awm tawh a, chung mite chu Pang khaw constituency atanga thlan tlin, Pu H. Thangchemsanga leh Sanghau East bial atanga thlantlin, Pu B. Thanchunga-te an ni.
——–

MZP Gen.Hqrs Office Bearer-te, vawiina thukhawm chuan tun hnaia Technical Entrance Exam Result-a thil fel lo awm nia sawi chungchangah MZP-in exam that an ngiat tih thuthang awm chu a dik lo tih an sawi a, sorkar-in enfiah se an duh tih an sawi chu mi thenkhatin hre sualin, exam that leh phut emaw an ti niin an sawi. MZP President, Pu C.Lalhmachhuana hnen atanga kan corr. thu dawn danin, he Exam-a thil fel lo awm ni-a sawi chu sorkar-in enfiah se an duh a, sorkar pawhin enfiah nghalin thutlukna pawh an siam nghal tih a sawi a ni. ZONET thu dawn danin MZP hruaitute thutkhawm zawh hian MZP hruaitute chuan Higher & Technical Education Secretary, Pi Esther Lalruatkimi chu a Pisa-ah an hmu nghal a, hemi hnu hian MZP-te hian sorkar thutlukna siam hi Executive Committee-in ngaihtuah tha leh se an ti niin a sawi.
————

United Nations Conference On Trade and Development (UNCTAD) leh Mizoram University-a Economics Dept.-in naktuk leh naktip hian MZU Campus Aizawl-ah International seminar an buatsaih dawn a. Thupui atan Asia chhim chhak biala India hmar chhak bial thil hralh chungchang hman a ni ang. He seminar buatsaih chungchang hi vawiin khan Aizawl Press Club-ah Project Director, Prof Lianzela leh Asst Project Director, Dr Vanlalchhawna’n thuthar lakhawmtute an hrilh a, Dr Vanlalchhawna chuan India leh ram dang 10 thawh hona, Association of South East Asian Nations (ASEAN) tia hriatte insumdawn tawnna a kalpui mekah eng bungrua leh service te nge an duh zawng tihte ngaihtuahna tur a ni tih a sawi. He Seminar-ah hian USA, Bhutan, Reserve Bank of India (RBI), IIM (Ahmedabad), Indian Institute of Foreign Trade (IIFT), New Delhi, CUTS International (Jaipur) leh hmarchhak biala University, IIT leh college hrang hrang atangin mi 30 chuang tel tura beisei an ni.
———–

Ni hnih awh tur Mizoram Government Doctors’ Association Annual General Conference vawi 26-na chu, Berawtlang-a Multipurpose Hall-ah vawiin khan tan a ni a, Health Minister Pu Lalrinliana Sailo leh Parliamentary Secretary, Pu S. Laldingliana’n an hmanpui.  Minister chuan Doctor-te chu sawn kual an ngai dawn tih sawiin, transfer and posting chu thil tih hrehawm tak ni mah se, tih loh theih loh a ni dawn tih a sawi a, thingtlang lamah damdawi thi tep-te sem a awm thin tih sawiin, a supply-tu leh a dawngtute pawh fimkhur a ngai hle tih a sawi. Parliamentary Secretary Pu S. Laldingliana pawhin thu a sawi bawk. MGDA Annual General Conference ni khatna hi Dr.K. Lalbiakzuala’n a kaihruai a, an President, Dr. Gordon Zohmingthanga’n thu a sawi bakah an thawhpui, pension-a chhuak 5 an thlah bawk. Sorkar doctor-te Conference hi naktukah chhunzawm a ni ang.
———–

Misualten tun thla ni 10-a an ruk bo, SWEETY Real Estate Company-a Junior Engineer, Pu Tankiswar Gogoi chu a ru botute Camp atangin vawiin khan a tlan chhuak a, Buhchangphaia an Camp-a a tlan luh hnuah Kolasib Police-te hnenah a hriattir a, Kolasib Police-te chuan Pu Gogoi hi vawiin khan Buhchanga an Camp atangin Kolasib-ah an la. Kolasib-a kan Corr. hnen atanga thu dawn danin, Pu Gogoi-a ruala misualte rukbo, Driver erawh chu tun thlengin chin hriat lohvin a la awm a ni. SWEETY Company hi Assam-a Dolchhora leh Bairabi inkar kawng siam hnathawktu a ni a, amah ru botute hi Cachar District-a misual pawl 1, United Democratic Liberation Army invuahte nia hriat a ni.
————

Vawiin khan CID Crime hnuaia Special Narcotics Police-ten,  Zuangtui-ah ruihhlo, Heroin, penicillin bur sawm an man a, a neitu, Lallunghnema kum 24, Lalhmangaihzuala fapa leh Lallungmuana kum 22, Lalrothanga fapa, Burma-a Chekawn khuaa mi, tuna Zuangtuia khawsa nia insawi ve ve-te chu an man nghal bawk. An ruihhlo man hi cheng 28,000 man nghal a ni a, an pahnih hian thubuai siamsak an ni.   
———-

Vawiin khan Horticulture Minister, Pu H. Liansailova hovin Agri. Conference hall-ah Mizoram pum huapa lo neitute intawh khawmna, Farmers’ Meet hman a ni a, Minister chuan hlawhtlinna chu sawrkar atanga a thlawna thil dawn chauhah a innghat lo tih a sawi. Pu Liansailova chuan lo neitu dik takte chuan Farmers’ Identity Card nei thei se, chung chauh chuan sawrkar atanga tanpuina dawng se a duh thu a sawi a, sorkarin NLUP kalpui a tum dante leh sum dinhmun a sawifiah bawk. Farmers’ meet hmanna inkhawm hi Horticulture Director, Pu Samuel Rosanglura’n a kaihruai a, kuthnathawktu pawl hrang hrangte an tel a ni. Horticulture Secretary, Pu Nghaklianmawia pawhin lo neitute chu an thlai chin emaw, ran vulh emaw apiang, duat taka vulha enkawl turin a rawn a ni.
—————

Ni 3 awh tur, hlemhlet do zirhona, Workshop  chu vawiin khan ATI Conference Hall-ah tan a ni a, he hun hmanpuitu, Chief Secretary, Pu Vanhela Pachuau chuan eirukna hian a huam zauh em avangin a do tura ke pen dawn chuan mite huat hlawh inhuam a tul tih a sawi a, mi hlemhle-te hrem turin Dan hriat a pawimawh a, Mizoram sorkar officer-te chu hemi kawngah hian nasa zawka an inzir peih a tul tih a sawi a ni. He workshop-ah hian Advocate Pu L.H.Lianhrima, District & Sessions Judge, Pu KL.Liana, Spl.Secretary, Pu P.Singthanga, Pu Rualzakhuma, Pu Lalhmingliana Saiawi, MUP President, Pu H.Raltawna, Anti-Corruption Bureau Addl. SP, Pu LB.Chhetri leh Lengzem Editor, Pu Vanneihtluanga te thuziah zirho a ni dawn a ni. Hawnna inkhawm-ah hian workshop buatsaih chhan leh a kalpui dan tur tlangpui sawi a ni.
————

MNF party chuan Meghalaya-a NCP MP, Agatha Sangma, Union Minister of State tura ruat a ni chu an lawmpui tih thuchhuah siamin an sawi a, hemi rual hian state Assembly inthlanna-a Congress chak filawrna, Mizoram MP, Minister tur zinga a hming lam rik a ni ve lo chu rualawhthlak an tih thu an sawi tel a ni. MNF thuchhuah chuan Pu Sainghaka, Congress hruaitu a nih laia Dr.C. Silvera, Union Minister-a a lut ang khan Pu CL Ruala pawh Minister ni ve se an duh hle niin an sawi bawk.
———-

Tuikual North YMA Hall-ah vawiin khan a thlawna inentirna, Free Clinic buatsaih a ni a, hei hi sawrkar laipuia Social Justice and Empowerment Ministry hnuaia National Institute for the Orthopaedically Handicapped, North Eastern Centre leh Tuikual North VC tangkawp buatsaih a ni a, beng tha lo, tha zam leh ruh natna nei mi 202 an inentir a, a mamawh zual hnenah bengdar leh Wheelchair, a thlawnin pek nghal a ni. Heng natna chi hrang hrang avanga harsatna tawkte hi Dr. R. Lalhmachhuani, Dr Sarju Moirang leh Dr Manoj Kumar-ten an  en a ni
———

World Taekwondo Federation (WTF)-in Mizoram Amateur Taekwondo Association (MATA) hnuaia Black Belt 1st Dan, 2nd Dan leh 3rd Dan kai thar-te hnena Belt leh Certificate a rawn pek chu vawiin khan I&PR Auditorium-ah hlan a ni a,  Industry Minister, Pu S.Hiato-a’n an hlan a ni. He hun, MATA President, Pu Rosiama Vanchhawng kaihhruai-ah hian Pu Hiato chuan  MATA-in ram chhungah medal 342, ram pawna medal 7 lai an la thei chu lawmawm a tih thu a sawi a ni. MATA hnuaia Belt hrang hrangte hi South Korea khawpui, Seoul-a World Taekwondo Federation hmunpui atanga rawn hlan vek a ni a, vawiina Black Belt Dan 3 (pathum) hlan, mi 15 zingah  hian hmeichhia 4 an tel a, an zinga naupang ber, Linda Lalchungnungi, Armed Veng chu kum 15-mi a ni. MATA hi kum 1987 November ni 19-a din a ni a, tunah hian Black Belt 4th Dan pathum, 3rd Dan pakhat, 2nd Dan 7 leh 1st Dan 65 an awm a ni.
———–

Technical Entrance Exam result chu ennawn a nih loh tur thu leh, result puan tawh chu pawm tlang a nih tur thu, sorkarin a puang. Hemi chungchanga sorkar thuchhuah sawi danin, tun hnaia tihchhuah, Technical Entrance Exam result chungchangah hian sawiselna engemawzat awm mah se, Selection Board-in uluk taka a ngaihtuah hnu-ah Technical Selection Rules-in a lo sawi angin Result ennawn leh emaw, Paper en that leh emaw chu phal a ni lova. Ningani kal taa result lo puan tawh leh sawrkar-in a lo pawm tawh chu tihdanglam lohvin a ngaia kalpui tur a ni. He exam hi hmun thum - Govt. Hrangbana College, Govt. Aizawl College leh Govt. Aizawl North College-ah tun thla ni 6 khan neih a ni a, a result pawh Ningani kal ta, tun thla ni 21 khan tihchhuah a ni a, Result puan a nih hnu hian Board hian lungawi lohna leh sawiselna hrang hrang a dawng a, a tam ber chuan an chhanna en nawn leh an phut a ni. An thu thehluh zinga a tam berah chuan Govt. Hrangbana College exam Centre Room No. 27-a exam vengtuten chhan dan an hrilh dik loh chungchang tarlan a ni a, mahse brochure leh answer book-ah a chhan dan tur chiang taka tihlan a ni a, brochure hi candidate zawng zawng hian an nei vek a ni. Exam duty tur zawng zawngte hi an duty-a an tihdan tur hrilhfiah vek an ni bawk. Zawhna paper chungah chiang taka chhan dan tur tarlan laia exam beitute’n zawhna an siam chu a vengtu-in a dik lova a chhan bawk si avangin Exam-na Room danga harsatna thleng lo chu he Room No. 27-naah hian a lo thleng ta a ni. Hemi chungchang hi vawiin khan Selection Board-in a ngaihtuah a, dan ding lai angin result ennawn leh emaw, Paper en that leh emaw chu phal a ni lova. Result lo puan tawh chu tidanglam lohvin a ngaia kalpui tur a ni tih chu an thuchhuak a ni ta a, June ni 2 leh ni 3-a Counselling tih tur pawh ruahman lawk anga kal tlangpui a ni ang a, Hrangbana College Room No.27 a exam vengtute chungchang chu sawrkar-in a ngaihtuah dawn tih sorkar thuchhuah chuan a sawi.

Higher & Technical Education Minister, Pu Lalsawta chuan hemi chungchangah hian he Exam-a thil dik lo awm ni-a lang titu chu sorkar-in hreh tak chungin a chungah hremna a lek dawn tih vawiin tlaia a Pisa-a thuthar lakhawmtu thenkhat a hrilh a, he thila harsatna lo awm chu pawi a tih thu leh, a enkawltu Minister a nihna ang pawhin zahthlak a tih thute, a tuartu zirlaite rilru pawh a hriat thiampui thu a sawi a ni. Minister chuan examchhanna turah a tih dan tur a inziak vek a, mahse room no. 27-a thute chuan ring zo lovin anmahni vengtu chu an lo zawt a, a vengtu-in a lo hrilh dik si loh avangin an tuar ta tih a sawi a, exam danah chuan a endiktute’n chhanna dik chauh an pawm ang tih a nih avang leh chhanna dik lo chu pawm theih a nih tak loh avangin fail an awm ta tih a sawi a ni. Pu Lalsawta chuan he exam result chhuak tawh chu Board-in exam that leh tul a ti lova, a tihsual-tirtu chu sorkar-in a chungah hremna a lek dawn tih a sawi a ni……………………………… Puan tawh anginhe exam-ah hian Hrangbana College-a thute an tling lo tiha awm avangin boruak lian tak a awm a, hemi chungchangah hian Pu Lalsawta chuan nimin tlai khan a Pisa-ah Department thuneitute a ko khawm a, heta an thurel chu nizan khan TV News pakhatin Exam that leh tur anga a lo puan avangin vawiin khan he Exam-a tlingte chu lungawi lovin an pung khawm a, Minister Pu Lalsawta chu hmu-in Minister hian a ngaia thil kalpui a nih tur thu a lo hrilh a ni.
————–

CM, Pu Lal Thanhawla’n Mizoramin buhfaia harsatna a tawh mek chungchang, sorkar laipuia a thlen chu a sut kian dan tur, nimin khan sorkar mi pawimawhten an sawiho. Sorkar thuchhuah sawi danin, hemi chungchang sawihona hi Cabinet Secretary-in a hova, Defence, Home leh Petroleum Secretary-te, Central Railway Board Chairman, CRPF Director General leh Intelligence Bureau Director te an tel a ni. CM chuan Mizoramah buhfai a thleng ngei a ni tih mit ngeia rawn hmu turin sorkar laipui chu a ngen a. Hemi atan hian vawiin khan Home Ministry-a Special Secretary leh mi pawimawh dangten Guwahati an pan nghal niin sorkar thuchhuah chuan a sawi a, hel hovin rel tlan lai an lo kah thin chungchangah naktuk khian Haflong an pan leh nghal dawn niin a sawi.
————

Vawiin khan Govt. Hrangbana College NSS bul tumin, zirtirtu leh zirlaiten thisen pek runpui an nei a, Aizawl Civil Hospital Blood Bank-a thawkten an thisen hi an laksak a ni. Aizawl Civil Hospital hian tunlai hian damlo, thisen mamawhte hnena pek tur an nei tlem hle a, hemi hria hian Hrangbana College NSS hian chawpchilh takin thisen pek runpui hi an buatsaih a, mipa 71 leh hmeichhia 15, an vaiin mi 86-in thisen hi an pe a ni. Aizawl Civil Hospital Blood Bank-a thawkte hian an tlakchham lai taka Hrangbana College NSS-ten thisen an pe hi lawmawm an tih thu an sawi.
————-

Vawiin khan Environment & Forests Minister, Pu H. Rohluna leh he Deptt.-a Officer pawimawhte, PCCF Conference Hall-ah an thu khawm a, Aizawl pawna DFO te pawh an tel a ni. Minister chuan he Department-a hnathawk te inkarah leh Department leh mipuite inkarah thawhona tha neih a pawimawh thu leh, aikal lak phal a nih loh thu, officer kal khawmte chu a hrilh a, Mautam kum a liam chiah avangin mautuai leh rawtuai khawrhtute ven ngun leh zual a ngaih thu sawiin, sangha hrai chingte leh sa pel chingte pawh dim lova hrem turin a hrilh bawk. NLUP hmangin ram ngaw siam thar tum a nih thu sawiin Minister chuan, Green Mizoram Day lo thleng turah pawh tlawmngai pawlte leh mipuite nena tangruala he Ni hi ngai pawimawha uar leh zuala thingphun tura tan lak a tul thu pawh Forest deptt. officer-te chu a hrilh bawk a ni.
————

LAD Minister, Pu PC Lalthanliana chuan mipui rorelna intanna, VC atangin rorelna dik leh fel fai neih a ngai a ni a ti. Mamit District pum huap VC seminar leh training, vawiina Mamit Chhim Venga neihah he thu hi sawiin LAD Minister chuan mipuite tawngtaina atanga lo ding, Congress kaihhruai sorkar chuan dikna tungdinga hlemhletnadova mipui tan hna thawh a tum a ni a ti a, mipui rorelna intanna VC-te chu dikna, rinawmna leh taihmakna neia hna thawk turin a chah a, mahni mimal hamthatna ngaihtuah vanga sorkar hnathawk mi hlemhle-te thurualpuia eirukna a inhnamhnawihte chu sorkarin a dim dawn lo tih sawiin, thil ti dik lo VC-te chungah sorkarin ngaihnathiamna a nei dawn lo a ni tih a hrilh a, VC member-te inkarah mahni tanghma hai vang leh thil dang avanga inerna leh neuh neuh a awm chuan VC-ten mipui rawng an bawl tha thei lo thin tih sawiin lungrual taka hna thawk turin a chah bawk a ni. VC Seminar leh training hawnna inkhawm hi LAD Director, Pu Biaktluanga’n a kaihruai a,Chawhnu lamah Planning Assistant, Pu F. Ronguaua leh Pi Lalrempuii-ten VC-te tihtur leh mawhphurhnate, Account vawn dan leh Office kalphungte VC member-te chu an hrilhfiah a ni. LAD Minister hian Finance Commission 12-nain VC-te hnathawhna atana a ruahman cheng nuai 36 leh sang 4 chu DLAO, Pu S. Lianhmingthanga kutah a hlan bawk. LAD Minister hian Mamita DLAO Office leh Compound-te a hmunah a tlawh bawk a ni.
————

Kolasib District-a sorkar driver-te chuan vawiin khan Road Safety Week an hmang tan. Kolasib Diakkawn-a National Highway-a hawnna inkhawmah Mamit Distict Addl. SP, Pu Lalthafamkima’n road safety week hi a hawng a, driver-te chu fimkhur taka motor khalh tur leh motor khalh laia anmahni tibuai thei chi ruih theih thil laka insum tura ngenin traffic rules tha taka zawm turin a chah bawk a ni.
———

Mizoram Board of School Education (MBSE) chuan HSLC leh HSSLC Compartmental Exam result, naktukah a tichhuak dawn. MBSE thuchhuah tarlan danin result hi naktuk chawhma dar 10-ah MBSE Office-ah tar chhuah a ni dawn a ni.
——–

Centre of Indian Trade Union Mizoram chuan sorkarin City Bus-a chuan man, ticket hmanga khawntir a tum chu lawmawm an tih thu leh sorkar thil tum chu an thlawp thu an sawi. Hemi chungchanga an thuchhuahah chuan ticket system-a Bus fare khawn a nih chuan Bus neituten Bus chuan man dik takin an hmu thei ang a, eirukna titlemin hlawk zawk leh dik zawkin sum an dawng thei dawn niin an sawi a, Aizawl City Bus Owners Association pawh Mizoram Minimum Wage Rules anga driver, conductor leh stand checker-te hlawh pe turin an ngen nghal a ni. Hemi rual hian motor spare parts leh thil dang Mizorama to uchuak bika hralh a nih loh nan hma la turin sorkar an phut bawk a ni.
———-

Mautama sazu puangin a nghawng chi hrang hrangte, Agriculture Department buatsaihin vawiin khan sawiho a ni. He sawihona, Agriculture Department Conference Hall-a neihah hian Mizoram University-a Asst. Professor, Dr. F. Lalnunmawia chuan sazu puangin a chhehvela thil awm dan pangngai a tihbuai dan a sawi a, kum 2007-a mau a tam khan mau bakah phulrua a tam a, sazu bakah ramar an puang a, thangnang pawh mau tamna hmun apiangah an puang bawk niin a sawi a, J. Thankima College-a Lecturer, Pu JV Nunchunga chuan mau tam leh a kaihhnawiha thil thlengten Mizote khawsak dan dinhmun a nghawng dan a tarlang a, mautam kaihhnawiha sazu leh thil dang puangin tam a thlen avangin kum 1959-a mautam khan MNF movement a hring chhuak a, kum 2007-a mau a tam pawhin rethei leh hausa inkar nasa takin a tizauva, nun tha lo chi hrang hrang a hring chhuak niin a sawi bawk. Pu J. Rothanga pawhin sazuin buh leh thlawhhma a tihchhiat dan a tarlang bawk a ni.
———

Aizawl City Bus Owners Association hruaitute chuan City Bus chuan man, sang lutuk anga sawi chu hriat sual vang niin an sawi a, Bus chuan man hi anmahni siam ni lovin State Transport Authority siam a ni tih an sawi. He thu hi Ngaizela an Office-ah ZONET zawhna chhanga an sawi a ni a, ACBOA hruaitute chuan STA-in Bus chuan man en nawn an tum chu Special Assembly-a member kalte’n a tawp thleng do an tum tih lungrual takin an pass tih an sawi. Tun hnaia tuialhthei man vawi 2 lai tihhniam a nih hnu-a Bus chuan man tihhniam a ni ve lo chu mipui zah lohna a nih leh nih loh zawhna chu ACBOA hruaitute chuan hei hi Mizoram Consumers Union hruaitute leh mipuiin thil an hriat sual vang a ni an ti a, tuialhthei man ringawt chu bus chuan man to chhan a ni lo nia sawiin, tuialhthei man chu tlahniam mah se, engine oil man leh spare parts man a tlahniam ve ngai lo tih an sawi. MCU hruaitute’n Aizawl City bus chuan man chu a tlang ram ve tho state dangte aiin a sang lawt lak tih an sawi chu chhangin ACBOA hruaitute chuan, Aizawl City Bus-ah chuan Extra-Mile an thun avangin an senso a sang bik tih an sawi a ni………. ACBOA hruaitute chuan City Bus-ah naupang leh kum lama upa-te tan concession an siam tih an sawi a, hei hi state danga private bus-te’n an ti ve ngai lo niin an sawi bawk. Puan tawh angin Aizawl khawpui chhungah hian City Bus 260 an awm a, kar khatah a ni khat an ding theuh a, Ngaizel atanga Zemabawk thlenga tlana Ngaizela let leh ni round khat an ti a, nipui laiin Bus pakhat hi ni khatah vawi 3 an round hman a, thlasik laiin vawi 2 an round hman a ni.
————–

Vawiin tlai dar 4 leh a chanve vel khan Aizawl Dinthar Vengah Pu Lalvunga ban khur a chim avangin hnathawkte, lei minin a chhilh a, a bul vela mipui pung khawmin theihtawpa an beih hnuah hnathawk pakhat chu an la chhuak a, a lo thi fel hman tawh nia thu dawn a ni. Amah hi Matab-ud-din, kum 21 mi, Mustaq Ali fapa, Assam, Karimganj Dist-a Beirangam khuaa mi a ni a, an khaw lama a ruang thawn dan tur hi buaipui nghal a ni. Pu Lalvunga In sakna hi Dinthar Venga Baptist Kohhran Biak in thlangah a ni.
———–

Mizoram aiawha Lok Sabha member atana thlan thar, Pu C.L. Ruala chuan Mizorama tuialhthei leh boruak alh thei zawn chhuah hna thawh chungchangah Zirtawpni khan Petroleum Ministry hnuaia Hydro-Carbon Director General a hmu a, Mizoramah leilung hausakna zawn mek a nih thu leh Company hrang hrangten hna an thawh dan, a hmuna enpui turin amah pawh thla leh khian lo zin a tum thu a lo hrilh niin sorkar thuchhuahin a sawi. Pu CL Ruala hian tuna Mizorama thawk mek, Oil India Ltd. Chairman leh Managing Director (CMD), Pu N.M. Borah pawh a kawm bawk a, kum 5 chhungin tui leh boruak alh thei zawn chhuah nan khur nga tal verh hman an tum thu leh, a senso tur, US dollar maktaduai 170 zet pawh an ruahman fel tawh thute a lo hrilh niin sorkar thuchhuah chuan a sawi.
———–

ZONET buatsaih, Mizo Idol thlanna atana intihsiakna chu zanin hian chhunzawm a ni leh dawn ta a, dar 8-ah tan leh a ni ang. Zanin hian mi 51 zai tura beisei an ni a, zan dang ang bawkin intihsiaknaa tel turte chu dar 7-a ZONET Office thleng hman tura hriattir an ni a, zai turte leh anmahni tawiawmtute chu ZONET office chhawng hnuai lam, Vanglaini Chanchinbu Office bul atanga ZONET Office pan tura hriattir an ni. He intihsiakna, Elimination Round, zan thum neih tawhah round khatna lut turin mi 36 thlan an ni tawh a, tun kar chhung hian zanin bakah Ninga zan leh Zirtawp zanah intihsiak hi chhunzawm leh a ni ang.